မွန်ပြည်နယ်အတွင်းရှိ မြို့နယ်များတွင် ဥပဒေနှင့်အညီ နေထိုင်လျက် ရှိသော လူဦးရေစာရင်းများကို မြို့နယ်တစ်ခုနှင့်တစ်ခု အပြန်အလှန် တိုက်ဆိုင်စစ်ဆေး ဆောင်ရွက်ခြင်း(Cross Check) လုပ်ငန်းနှင့် စပ်လျဉ်း၍ ညှိနှိုင်းအစည်းအဝေးကို ဒီဇင်ဘာလ ၂၆ ရက်နေ့၊ နံနက်ပိုင်းက ပြည်နယ်အစိုးရအဖွဲ့ရုံး၊ အောင်ဆန်းခန်းမ၌ ကျင်းပပြုလုပ်ရာ မွန်ပြည်နယ် ဝန်ကြီးချုပ် ဦးဇော်လင်းထွန်း၊ ပြည်ထောင်စုရွေးကောက်ပွဲကော်မရှင်အဖွဲ့ဝင် ဦးသန်းဝင်း၊ ပြည်နယ်ဝန်ကြီးများ၊ ဌာနဆိုင်ရာတာဝန်ရှိသူများ တက်ရောက်သည်။
ဦးစွာ ပြည်နယ်ဝန်ကြီးချုပ်က မွန်ပြည်နယ်အနေဖြင့် ပါတီစုံ ဒီမိုကရေစီအထွေထွေရွေးကောက်ပွဲတွင် မဲစာရင်းများ ပြည့်စုံမှန်ကန် စေရေးအတွက် အလေးအနက်ထား ဆောင်ရွက်လျက်ရှိကြောင်း၊ မဲစာရင်းများ ပြုစုနိုင်ရန်အတွက် ကြိုတင်ပြင်ဆင်ခြင်း လုပ်ငန်းများကို ၂၀၂၁ ခုနှစ်၊ ဩဂုတ်လမှ စတင် ဆောင်ရွက်ခဲ့ပြီး မြေပြင်နှင့်တိုက်ဆိုင်စစ်ဆေးခြင်းလုပ်ငန်းကို ၂၀၂၂ ခုနှစ်၊ မေလတွင် ပြီးစီးခဲ့ပြီဖြစ်ပါကြောင်း၊ မဲစာရင်းတိကျမှန်ကန်စေရေးအတွက် လူဦးရေစာရင်းသည် အဓိကကျသလို သတ်မှန်အချိန်အတွင်း ပြီးစီးဆောင်ရွက်နိုင်ရန်လည်း အရေးကြီးကြောင်း၊ ရွေးကောက်ပွဲကော်မရှင်အဖွဲ့ခွဲတို့သည် သတ်မှတ်ချက်များ နှင့်အညီ မဲစာရင်းများပြင်ဆင်ခြင်းနှင့် ဖြည့်စွက်ခြင်း ဆောင်ရွက်ရာတွင် သက်ဆိုင်ရာ ဌာနများ ဝိုင်းဝန်းပူးပေါင်း ဆောင်ရွက်ကြရမည် ဖြစ်ကြောင်းဖြင့် အမှာစကား ပြောကြားခဲ့သည်။
ထို့နောက် ပြည်ထောင်စုရွေးကောက်ပွဲကော်မရှင်အဖွဲ့ဝင် ဦးသန်းဝင်းမှ လူဦးရေစာရင်းများကို မြို့နယ်တစ်ခုနှင့်တစ်ခု အပြန်အလှန် တိုက်ဆိုင်စစ်ဆေး ဆောင်ရွက်ခြင်း(Cross Check) လုပ်ငန်းနှင့် စပ်လျဉ်း၍ ဆွေးနွေးခဲ့ပြီး ပြည်နယ်လူဝင်မှုကြီးကြပ်ရေးနှင့် ပြည်သူ့အင်အားဆိုင်ရာ ဦးစီးမှူးရုံး၊ ပြည်နယ်အထွေထွေအုပ်ချုပ်ရေးဦးစီးစီးဌာန၊ ရွေးကောက်ပွဲကော်မရှင်အဖွဲ့ခွဲရုံးတို့မှ တာဝန်ရှိသူများမှ သက်ဆိုင်ရာ ကဏ္ဍများအလိုက် ရှင်းလင်းတင်ပြခဲ့ကြကာ တက်ရောက်လာသူများမှ လိုအပ်သည်များကို ပေါင်းစပ် ဆွေးနွေးညှိနှိုင်းခဲ့ကြသည်။
၂ဝ၂၃-၂ဝ၂၄ ဘဏ္ဍာရေးနှစ် မွန်ပြည်နယ်၏ အရအသုံးခန့်မှန်းခြေငွေစာရင်း တင်ပြချက်များနှင့် စပ်လျဉ်းသည့် ညှိနှိုင်းအစည်းအဝေးကို ယနေ့နံနက်ပိုင်းက ပြည်နယ်အစိုးရအဖွဲ့ရုံး၊ ဆောင်ဆန်းခန်းမ၌ ဆက်လက်ကျင်းပပြုလုပ်ရာ ပြည်နယ်ဝန်ကြီးချုပ်က မွန်ပြည်နယ်တွင် ဘဏ္ဍာရန်ပုံငွေရန်ပုံငွေကို သုံးစွဲမှုအနေဖြင့် ပြည်ထောင်စုထောက်ပံ့ငွေမှ ရငွေနှင့် ပြည်နယ်၏ အခွန်ကောက်ခံရရှိမှုမှ ရငွေများအပေါ် အဓိကအားဖြင့် မူတည်၍အသုံးစရိတ်ကို ပြန်လည်ခွဲဝေသုံးစွဲနေရခြင်း ဖြစ်ပါကြောင်း၊ အသုံးစရိတ်များကို လျာထားရာတွင် ဒေသဖွံ့ဖြိုးတိုးတက်ရေးကို အလျင်အမြန် အထောက်အကူပြုသည့် အသုံးစရိတ်များ ကိုသာ အဓိကလျာထားရာထား ဆောင်ရွက်ကြရမည်ဖြစ်ကြောင်း၊ အရအသုံးခန့်မှန်းခြေ ငွေစာရင်းခွင့်ပြုငွေအသုံးစရိတ်များကိုလည်း ဘဏ္ဍာရေးစည်းမျဉ်း စည်းကမ်းများ နှင့်အညီစနစ်တကျသုံးစွဲကြရန် လိုအပ်သလို ရငွေများကိုလည်း လျာထားချက်အတိုင်းပြည့်မီအောင် ဆောင်ရွက်ရန်လိုအပ်သဖြင့် အမှန်တကယ်ရရှိနိုင်သည့် ရငွေများကိုသာ လျာထားကြရန် လိုအပ်ကြောင်းဖြင့် အမှာစကားပြောကြားသသည်။
ထို့နောက် ပြည်နယ် အရအသုံးခန့်မှန်းခြေ ငွေစာရင်းဦးစီးဌာန ညွှန်ကြားရေးမှူး ဦးအောင်ထက်မှ မွန်ပြည်နယ်ဘဏ္ဍာရန်ပုံငွေတွင် ပါဝင်သည့် ဌာန/အဖွဲ့အစည်းများမှ အဆိုပြုတင်ပြလာသော ၂၀၂၃-၂၀၂၄ ဘဏ္ဍာ ရေးနှစ် ဘဏ္ဍာငွေအရအသုံးခန့်မှန်းခြေငွေစာရင်းများအား ရှင်းလင်းတင်ပြခဲ့ပြီး တက်ရောက်လာသူများ ဖြည့်စွက်ဆွေးနွေး တင်ပြခဲ့ကြမှု အပေါ် ပြည်နယ်ဝန်ကြီးချုပ်က လိုအပ်သည်များကို ပေါင်းစပ်ညှိနှိုင်း ဆောင်ရွက်ပေးခဲ့သည်။
