မွန်ပြည်နယ်အတွင်း မြို့ပေါ်ရပ်ကွက်များသာမက ကျေးရွာများပါမကျန်
သန့်ရှင်းသာယာ လှပစေရေး အလေးထား ဆောင်ရွက်လျက်ရှိရာ မွန်ပြည်နယ် ဝန်ကြီးချုပ် ဦးဇော်လင်းထွန်းနှင့် တာဝန်ရှိသူများသည် ဇန်နဝါရီလ ၁၄ ရက်နေ့၊ နံနက်ပိုင်းက မော်လမြိုင်မြို့၊ ဇေယျာမြိုင်ရပ်ကွက်အတွင်း ဌာနဆိုင်ရာတာဝန်ရှိသူများ၊ မီးသတ်တပ်ဖွဲ့နှင့် ရပ်ကွက်နေပြည်သူများက စုပေါင်းပါဝင်သည့် ပြည်သူ့အကျိုးပြု စုပေါင်းသန့်ရှင်းရေး ဆောင်ရွက်နေမှုကို ကြည့်ရှုအားပေး၍ ပြည်နယ်ဝန်ကြီးချုပ်က ရပ်ကွင်အတွင်း သန့်ရှင်းသာယာလှပစေရေးနှင့် အမှိုက်များ စနစ်တကျစွန့်ပစ်ကြစေရေး ဆောင်ရွက်ကြရန် လမ်းညွှန်မှာကြားခဲ့သည်။
ဆက်လက်ပြီး ပြည်နယ်ဝန်ကြီးချုပ်နှင့်အဖွဲ့သည် မော်လမြိုင်မြို့၊ အမှတ် (၆) အခြေခံပညာအလယ်တန်းကျောင်းသို့ရောက်ရှိခဲ့ကြပြီး တာဝန်ရှိသူများနှင့် တွေ့ဆုံ၍ ပြည်နယ်ဝန်ကြီးချုပ်က စာသင်ကျောင်းများ ဥပတိရုပ် ကောင်းမွန်စေရေးနှင့် ကျောင်းပုရဝုဏ် သန့်ရှင်းစေရေး တို့ကို အလေးထားဆောင်ရွက်ကြရန် လမ်းညွှန်မှာကြားခဲ့သည်။
အဲဒီနောက် ပြည်နယ်ဝန်ကြီးချုပ်သည် ကျောင်းပတ်ဝန်းကျင် သန့်ရှင်းသာယာလှစေရေးနှင့် စိမ်းလမ်းစိုပြေစေရေးအတွက် ကျောင်း၀န်းအတွင်း၊ အပြင်ခြုံနွယ်မြက်ပေါင်းများအား ခုတ်ထွင်ရှင်းလင်းခြင်းနှင့် အမှိုက်များအား ရှင်းလင်းခြင်းဖြင့် စုပေါင်းသန့်ရှင်းရေး ဆောင်ရွက်မှုတို့ကို ကြည့်ရှုအားပေးခဲ့သည်။
မွန်ပြည်နယ်အတွင်း မြို့နယ်အသီးသီးရှိ ရပ်ကွက်၊ ကျေးရွာများတွင် သန့်ရှင်းသာယာလှပစေရေးအတွက် ပြည်သူ့အကျိုးပြု စုပေါင်းသန့်ရှင်းရေးကို အများပြည်သူများ တစ်တက်တစ်အားပါဝင်၍ အပတ်စဉ်ပုံမှန် ဆောင်ရွက်လျက်ပြီး စာသင်ကျောင်းများတွင်လည်း ကျောင်းသန့်ရှင်းသာယာလှပစေရေးအတွက် တပ်မတော်သားများ၊ မြန်မာနိုင်ငံရဲတပ်ဖွဲ့ ၊ မီးသတ်ဖွဲ့နှင့် လူမှုအဖွဲ့အစည်းများမှလည်း ဝိုင်းဝန်းကူညီ ဆောင်ရွက်လျက်ရှိကြောင်း သိရှိရသည်။