မွန်ပြည်နယ်အတွင်း နိုင်ငံ့စီးပွားမြှင့်တင်ရေးရန်ပုံငွေဖြင့် လုပ်ငန်းများဆောင်ရွက်ရာတွင် ထိရောက်အောင်မြင်မှုရှိစေရန်အတွက် ဒေသတွင်း အလားလာကောင်းများရှိသည့် စီးပွားရေးလုပ်ငန်းများကို ဦးစားပေးကဏ္ဍအလိုက် အကောင်အထည်ဖော် ဆောင်ရွက်ပေးလျက်ရှိရာ မွန်ပြည်နယ် နိုင်ငံ့စီးပွားမြှင့်တင်ရေးလုပ်ငန်းကော်မတီ လုပ်ငန်းညှိနှိုင်း အစည်းအဝေးအမှတ်စဉ် (၁/၂၀၂၃) ကို ယနေ့၊ နံနက်ပိုင်းက ပြည်နယ်အစိုးရအဖွဲ့ရုံး၊ အောင်ဆန်းခန်းမ၌ ကျင်းပပြုလုပ်ခဲ့ရာ မွန်ပြည်နယ် လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီးကျော်စွာမြင့်၊ ပြည်နယ်ဝန်ကြီးများ၊ ပြည်နယ် နိုင်ငံ့စီးပွားမြှင့်တင်ရေးလုပ်ငန်းကော်မတီဝင်များ၊ တာဝန်ရှိသူများ တက်ရောက်သည်။
အစည်းအဝေးတွင် မွန်ပြည်နယ်ဝန်ကြီးချုပ်(ကိုယ်စား) ပြည်နယ် လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီးကျော်စွာမြင့်က နိုင်ငံတော်၏ စီးပွားရေး အခြေအနေကို ပြန်လည်မြှင့်တင်နိုင်ရန်အတွက် နိုင်ငံ့စီးပွားမြှင့်တင်ရေးရန်ပုံငွေ မတည်ထောက်ပံ့ ငွေများဖြင့် မွန်ပြည်နယ် အတွင်းရှိ အဓိကအားဖြင့် စိုက်ပျိုး၊ မွေးမြူရေးလုပ်ငန်းများ၊ ငါးလုပ်ငန်းနှင့် သမဝါယမလုပ်ငန်းများကို စိစစ်အတည်ပြု၍ ပထမအကြိမ် ထုတ်ချေးဆောင်ရွက်ထားပြီးကြောင်း၊ ဒုတိယအကြိမ် ချေးငွေထုတ်ပေးမှုအခြေအနေအရ ဒေသ၏လိုအပ်ချက်များပေါ်တွင် မူတည်၍ ကဏ္ဍအလိုက် လုပ်ငန်းများကို မတည်ထောက်ပံ့ငွေထုတ်ပေးရန် အတည်ထုတ်ချေးထားပြီး တတိယအကြိမ် ထပ်မံချေးငွေရယူလိုသည့် လုပ်ငန်းများကိုလည်း စိစစ်တင်ပြကြရန်လိုကြောင်း၊ ဒေသန္တရဖွံ့ဖြိုးတိုးတက်ရေးကို အကျိုးပြုသည့်လုပ်ငန်းများကို ဦးစားပေးကဏ္ဍ အနေဖြင့် ဆောင်ရွက်ကြရမည်ဖြစ်သည့်အပြင် ရန်ပုံငွေသုံစွဲရာတွင်ပြည်သူလူထုကို တိုက်ရိုက်အကျိုးပြုသည့် လုပ်ငန်းများဖြစ်စေရန် လိုအပ်ကြောင်းဖြင့် အမှာစကားပြောကြားခဲ့သည်။
ထို့နောက် တက်ရောက်လာကြသော ကော်မတီဝင်မှ မွန်ပြည်နယ်အတွင်း နိုင်ငံ့စီးပွားမြှင့်တင်ရေးရန်ပုံငွေဖြင့် အကောင်အထည်ဖော် ဆောင်ရွက်ထားရှိသည့် လုပ်ငန်း အခြေအနေများ၊ နိုင်ငံစီးပွားမြှင့်တင်ရေးရန်ပုံငွေမှ မတည်ထောက်ပံ့ငွေများ ထုတ်ချေးထားမှုအခြေအနေများနှင့် ပတ်သက်၍ သက်ဆိုင်ရာ ကဏ္ဍများအလိုက် ရှင်းလင်းတင်ပြခဲ့ကြပြီး ပြည်နယ်ဝန်ကြီးများမှ ဖြည့်စွက်အကြံပြုဆွေးနွေးကြကာ လိုအပ်သည်များကို ပေါင်းစပ်ညှိနှိုင်း ဆောင်ရွက်ခဲ့ကြသည်။